Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Chinmi Khrihfabu Le Community Hna Kan Lian / Kan Thawng Deuh Chin Lai

Pathian hi Chinmi kan ca ko ah hin a ttha khun ko rua. Khuaruahhar in thil ttha a chuah / can ter. Minung ruahnak nih a phak khawh lo mi pinlei ah Pathian khuakhannak le thluachuah hi a rak um taktak tawn ko.

2018 June thla ah UNHCR nih Chin ralzam donghternak cu 2019 kum dongh ah kan tuah lai ti thawng an thanh. Malaysia le India ah lamlaklawh ah tlaihkhih le hrasatnak tang ah khuasa in a taap mi Chin ralzam 40,000 hrawng cu ngaihchia lungrawk in a tuah hna. An UN card hna cu an chuh thluahmah colh hna, hramhram tlaihkhih thongthlak a tam a karh chin i ruahchannak cu a dong thliahmah ko cang.

Ram thumnak a phan cang mi zong lungrethei vansang in um ve a si. Pathian thluachuah kutka nganpi aa awng mi cu aa khar tthan ko cang. Miphan thar an tlawm chin lengmang. Chunglekhat le sahlawh rualchan le hawikom dawt a taang mi hna caah lungzur cio a si.

Hi a pit, a mui i aa kham cangmi chung pil lio ah ruahlo in Pathian lamhruainak cu a van lang tthan. Chin mi a kan dawtu taktak le a kan dirpitu Australia Senator Dean Smith a van kan pek. Miphun caah suktung bang a dir peng mi le Chin ralzam hmawngttiamtu CHRO cu fak deuh in a van cawl ter tthan hna. Australia Chin Federation Upa hna zong a van dirter ve hna. Chin Community of Coffs Harbour Inc., Coffs Harbour Chin Immanuel Church, Victorian Chin Baptist Church le Chin Christian Council in Australia Inc. hna cu thazaang a chuah ter hna. Cu tik ah, Senator Smith tthithruainak le khuakhan piaknak in,

– December 3 & 4, 2018 ah Australia rampi cozah lenkai khawhnak a kan pek – Prime Minister le a bawitlang hna dotla ton khawhnak le Australia Chin mi kan hlawhtlinnak le kan tthatnak kong chimrel khawhnak a kan zaangfah. Australia nih Chinmi 10,000 leng nan kan lak cang nakcung ah kan i lawm tuk tiah chimrel khawhnak caanttha caan sunglawi a kan pek.

– March 1, 2019 ah UNHCR Malaysia Chief of Mission le Acting Australia High Commissioner to Malaysia ton khawhnak le Chin ralzam hna caah chimrel piak khawhnak caan sunglawi zong a kan pek fawn.

Minung ruah khawhnak pinlei ah khuaruahhar theitlai a van tlai colh mi hna cu,

– Australia Prime Minister Scott Morrison nih Myanmar ralzam tampi kan lak hna lai tiah Perth a tlawn lio March 7, 2019 ah thanhnak a tuah.

– UNHCR nih Chin ralzam donghternak cu kan let / kan ngol tthan tiah March 14, 2019 ah thanhnak an van tuah ve.

Ruahchannak thar a chuak. Mi thinlung a dam tthan. Hnangamnak le lawmhnak a tlung. Khuaruahhar daihnak a rung um.

Chinmi tampi ram thumnak ah an kal tthan hna lai. Chinmi Khrihfa zumtu kan karh lai. Chinmi Community le Khrihfabu hna kan lian / kan tthawng deuh lai. Sifak santlailo tampi le ruahchannak a dong cang mi nih Pathian thluachuah cu ttha chin pakhat hnu pakhat in an rel ve cang hna lai. Ngakchia tampi nih nunnak thar an co lai.

Maw khuaruahhar Pathian khuakhan ngai hi dah mu.

‘Nan ca i ka tinh mi cu keimah lawnglawng nih ka hngalh, tiah BAWIPA nih a ti. Cucu vanchiatnak silo in hmailei ruahchannak le thluachuahnak caah a si lai’ (Jeremiah 29:11)

(Thing tankhat, tlah ttemkhat in Australia Laimi santlai tthahnem kan si venak cu ttial hnawhchan mi a si)

Ref: Ca Lian Thang

 

Leave a Reply

Your email address will not be published. Required fields are marked *