Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Kan Laipaih Saduh Thahnak Siseh, Rung Lian Ceu Upat A Peknak; By Victor Biak Lian

Ruahnak: Kan Lai Paih Kong

Kan Lai Paih hi kan nunphung pakhat a si. Kan miphun lentecelh phunkhat “national sport” a si. Kan cawisan awk rian pakhat a si fawn.

Paih ka thiam lo na in paih zoh le boxing thongh zoh hi ka zuam tuk mi pakhat a si. Siangin kan kai lio ah Pu Antony Ngun Uk nih hin a kan hruai i Aung San Stadium ah Chin National Day hrawnghrang ah hin paihbual a kan serpi tawn. Kum chiar ngawt a si. Cu ah cun ka rak pai ve tawn. A si nain ahohmanh ka tei bal hna lo.

Champhai refugee camp ah paihbual cu kan tuah tawn i a kan nuamhtertu pakhat a si. Pumrua that, thazang thawn lawng a za lo. Paih thiam le thiamlo nih lai a rel teinak ah cun.

Kan hngakchiatlio ah minthang pawl hna cu Khuathar Mang Chum, Ruang Vai, Ram Peng, cu hna a chang ah Caw Uk, Hngiarlawn Peng(?), cun Ang Te (Ang Cung), Ui Kam etc.. Paihbual poh ah bualco kha an si ko. Khuahlun, khuathar le Chun Cung le Hngiarlawn hna hi bual aa cuh mi cu an si peng. National Day kan tuah poh ah paihbual lo cun khuazei hmanh ah tlam a tling ti lo. Mang Chun nih zeitluk in an ngan zong ah zung hnih ka cawi khawh hna ah cun ka tengh khawh hna a ti an ti. Mang Chum paih cu a diaihlei ah khin voi khat ka rak zoh manh ve.

Mizo nih hin “Chai” an ngei ve i kan nih paih he aa dang deuh. Japan Sumo zong a lo i, Cage fight phun zong khi a lo. Tutan ah kan nau le Nagaland ah an va i paih tik ah, Naga pawl dan le an phungphai kan theih, kan hmuh hna.

Tahan Capcarkut i Mizo “chai” hi a min a rak thang tuk. Kan mah Lai le patthawng zong an rak i tthua ve tawn. A hnu ah cun an phih piak hna a ruang cu lainawnnak tiang a rak chuahter ca ah a si.

Kan Lai Paih hi aa dawh ka ti. Mah belte, dan le dun fel deuh in kan ngeih a herh. Ramkip ah khua kansak nak ah Paih cu tuah cio a hung si. Kan i nuamhnak entertainment pakhat zong a hung si. Tukum zong ah Malaysia ah siseh, Hakha ah siseh dan le dun felfai a um lo ca ah a si lo ah tuanvo ngei an fel lo ca ah buainak le lungtlinlonak te te a chuak. Dan le dun hi “standardize” tuah a hau. Kan zapi nih tlaihfung pakhat kan ngeih i cu tahnak cun kan paih bual vialte hi kan hruai seh law a tha tuk hnga ti khi saduh ka that. Chin World Champion tbt, Hakha ah Paih cawn nak training tuahnak club tbt zong kan ngei cang hna. Hmundang zong ah a um len rih lai. Chin World Champion zong cu kan tuah ko cang.

Cu ca ah cun International Seminar on Lai Paih tuah i a ramkip in rak kai cio hna i cu phung le lam cu ser ding ah a tha hngalo maw ti khi ka ruat. Cutik ah International level in bu pakhat zong serko i, cu nih an kan hruai an kan tlangtlak ning le cun a herh ah cun zuamnak le title tbt zong kan tuah piak hna seh law ti saduh ka thah mi khi zapi nan sin ah ruahawk a cu ko cang lo maw tiah!

Lai Paih zoh a zuammi!

Victor Biak Lian
Ottawa

Note: Mah ca hin kan Lai Paih patthawng Rung Lian Ceu hi upatnak ka pek

Leave a Reply

Your email address will not be published. Required fields are marked *