Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Lolamtlaang Khuaruah (Facang In Tolre Ah…)

Facang biatak in Lairam ah kan cinnak hi Mirang chan hnu lawng khan a si– kum 100 kuakap lawng a si rih kan ti lai cu. Cu hmanh ahcun biatak tein a ciingmi hi thlanglei Laitlang deuh an si i chaklei Laitlang ahcun Thantlang dah tilo adang Hakha, Falam, Tedim le Tonzang lei ahcun facang hi tlanglo ah an ciing tuk lo.

Facang cin hi lopil a heu tuk hlei ah pawcawmnak khim taktak a kan pe kho tuk ti lo (Pawngkam environment a hrawh tuk timi tu hi cu a si lem lo). Ruahti cungah aa hngat tuk hlei ah kan vawlei zong a tar/phong chin lengmang i milu le kan karh chin lengmang tikah. Tukum zong Zahnaktlang le Thantlang peng khua tampi cu paam dawh kan si hoi ko hih.

Cu lioah ‘tolre’ ciin biatak tein a hung laar i kan thawchuak deuh. Thlennak(revolution) pakhat si hraam seh. Thlanglei Laitlang pawl cu tolre in an irum phahnak cang. Kanpetlet hna khi sifak bik Peng kan rak ti nain tolre thawngin a rum bik Peng ah aa chuah hnik cang. Chaklei Laitlang hi kan lungfim a tlai ti khawh a si nain caan kan ngei rih ko– tolre ciing cio hna usih. Ekah pakhat tolre a ciing cangmi chungkhar cu hmailei an pawcawmnak ca dingah lungrethei Tik awk a um ti lo. A rum lo hmanh ah zingzan rawl ei awk ah a buai hau lailo.

Kum 2020 thimnak ah aho party cozah kan kai zongah tolre sehzung (small or medium scale industry) cu thlanglei le chaktlei Lairam ah pakhat veve in a chiah hrimhrim hau. Khohsuai asiloah adangdang zong ser khawh. Atu i ahring le acar in kan zuar hmanh ah hitluk a miak si kaw value added chinchin cun atu aman i a let thum naktam in a kai kho. Cucaah cozah nih atu tein a cinning (technic), cinnak phaisahram (grant/loan) le azuarnak market biatak tein a bawmh awk a si. Cozah lei an khulnuar deuh I kan lung tha lo.

Hiti ti tikah tlaanglo facangcin hi kan khap lai ti phun in biachim ding zong a si hlei lo (Chin cozah upa pakhat nih nai ah a chim I ka lung tha lo ngai). Kanmah nakin a let tam in a thangcho cangmi Mizoram cozah (MNF) hmanh nih an policy (2019) ah tlanglo-facangcin a biapit tuk rihnak hitin an tial — “Shifting cultivation cannot be neglected and should be used to its full potential for raising crops especially our stable food ‘rice’”.

Kilometer 36000 tungvangpalh in a kaumi kan Chinram nihhin Chin miphun hi a kan cawm khawh tuk ko. Miphun dang bochan a hau lo. Mahte khuakhannak (self-determination) lawng kan herh. Hi hmanh hi Kawl le Rakhine nih kan vawlei tam ial an kan chuh rih– kan laak than lai. Chin miphun cu kan tuanbia in amah tein ai todelhmi miphun kan si I kan si peng ding zong a herh fawn.

Credit: Salai Ceu Bik Thawng

 

Leave a Reply

Your email address will not be published. Required fields are marked *