Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Pu Van Ceu Uk Nih Zohchunhawk Tlak Tein Um Le Kan Miphun Kilven, Tlaulo Funtom Aherh Zia

Miphun dang hmai ah zohchunhtlak tein nun long si loin kan Miphun tlaulonak ding caah kilven le i funtom deuh hi kan hau. Miphun in kan dir rih caah violent le burglary te hna cang mi nih kan miphun hmai a hngalterlonak cu asi. Nizan CCI- CACC nih mipi meeting auh mi ah Bukip in mipi 300 leng an kai kho. Lomh a um taktak. Tuanvo nganpi kan ngei cio hna.

Pu Van Ceu Uk nih zohchunh awktlak si kan herh zia tahchunhnak a lak mi hi a tha tuk. kan Miphun nih cinken a herh.Tulio kan boruak thil kalning he pehtlai in chap ka duh mi a um.

1. Nepal Nu pawl cu India ram rian an tuannak poah ah ai zuar mi an tam caah nautat mi miphun ah an i chuah. Nepal le Laimi cu kan i lawh pah caah a cheu hngakchia lungfim deuh lo nihcun lampi ah an kan hmuh ahcun Nepali an kan ti i an zam diam. Cuticun an far le nih Nepal ram le an miphun cu an min an chiatter.

2. Mizoram ahhin Mizo cu kan unau te an si ko nain um zia kan thiam lo ruangah, Kan Unau Mizo tiang nih an kan rem lo. Thawl tiang kan tong bal hna. Burma tiin an kan auh deuh caah khuachak lei Burma kan sinak kha chim le langhter awk khi hmai a rak hngal lo ngaingai.

3. Laimi tamnak Indianapolis ,USA ah kan ton cuahmah mi hi thuh awk tha lo in a zual thluahmah ko lai. Hihi Chin miphun caah hmaihngalter lo biktu zong asi ve ko lai. Apoi ti hlei in chim ding a um lo.

Zeitluk in Community upa le Nulepa hna nih tuanvo kan lak tti ti mi tu ah hmailei kong ahcun ai ngat te lai. Hmai cu a hngal hrim lo. Nain, Indy Laimi long si lai lo. State dang le Ram dang cio zong nih hrial awk tha loin kan tawn thluahmah ko lai. Nu le Pa balte nih Fale cungah rian nganpi kan ngei ti hi daithlang lo tein i theihfiang cio tu hi a herh ngaingai mi cu a si.

4. Nain hinak in Ramthumnak um Chin Miphun hna nih kan phan deuh ding a um. Laimi tamnak Indianapolis cu kan Mino tete hna chungin sualnak a karh caah a tih mi an tam,soitu an tam. Atlang piin chim ahcun ramthumnak kan um ve tikah hin kan ruah phak khawh lo mi thatnak hna cu kan miphun chungin tampi a chuah te lai bantuk in a zalawng mi ram ahhin chiatnak a chuahpitu zong kan mino hna chungin an chuak thluahmah chin ko lai ti hi ruah chih ve a hau..

Nain, Ka ruah tawn mi le ka tih bik ve mi cu kan ram ah dah kan kir than ti dah lo, mah tein state dang ah maw, ram dangdang ah maw Chin Miphun tlawmte he a um i khua a sa tu hna hi kan Miphun tlaunak hram ai thawknak cu asi te ko lai dah. Miphun tlaunak hi Silence killer bantuk asi caah kan i theih lokar ah rai bang an kan tlunh thluahmah te ding mi asi. Cu bantuk cu a tu lio miphun sinak in kan dir lio i thangchiatnak kan tawn mi nak in afak deuh mi problem Chin miphun nih kan tawn te ding mi cu asi.

Kan miphun caah a sunglawi mi puai events kan umnak cio ah tuah khawh peng kan hau. A tu tein CND ni tibantuk hmanh a tuah kho lo mi khua hna kan si ahcun hi hnu chankhat caah ruahchannak atlawm ngaingai cang.Indianapolis um Chinmi hna hi Fisrt Generation caahcun tihnung kan si hrim lai nain third generation pinlei caahcun Miphun humhaktu bik zong kan si ko lai. kan umnak ah Chin Community kha thazaang pek le thawnter i zuam zungza hna uhsihl.

Credit: Al Bik Lian Zaathang

Leave a Reply

Your email address will not be published. Required fields are marked *