Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

2020 Kawlram Thimnak Le Party Cheukhat Thlirnak

Atu lio kan Chinram thlihrang le Kawlram 2020 i thimnak kong he pehtlai in party dirhmun zohnak Meifar Thuthang nih a rak thlahmi mi chungin Falam ca in atang lei ah rel khawh rak i zuam ve hrim, thil sining kan theih mi nih hin lung awtom ngei lo in zei party dah kan miphun caah  atha lai ti hi na theih khawh lai, Kan ram sersiamnak ah a biapi ngai…

Kan Ram Politics 1:
2020 HRILAWKNAK LE PARTY HREKKAT THLIRNAK

Kan rampi cu 2020 November thla ah hrilawk leh ding a si ih a ni cu Election Commission in an ruat leh ding. Mipi in kan ram thil umdan le hawiher kan theih theinak dingah Kan Ram Politics tiin a remcan danih ngan kan zuam ding.
1. CNLD: Chin National League for Democracy hi CNDP, CLD le CPP kawmaw an si ih tu naiih Party Registration ngah an si. Tunai Mindat, Kanpalet le Matupi lam an tlawnnak khalah mipi in an rak cohlang zet. Party 3 kawm an si vekin Chinram ah cun an boruak a ṭha tawkfang dingah ruat sehla. Cukhal cu Chin mipi in an miphun, an hnam duhdawtnak ah ziangtluk an mit a vang timi parah a ṭhumaw ding.
#Paletwa le Matupi lamih boruak `hasin ding cun Mara Party le Khumi National Party tivek an lakluh bet a ṭul ding. Ramkulh khawpi Hakha le District khawpi Falam hman thleng ban lo hnam duhdawtnak fehpi ZCD pawl hi cu beisei ding a tam lem lo ding. Magwe, Bago le Rakhine rampawl ih cak an duh cun Asho Chin National Party le Mro party lakluh theih khal a thupi zet ding.
#Hiti duhsaknak mipi in an hlan karlak ah an phan zet mi pakhat a um. Cumi cu Rakhine party an hluan pang kei maw timi hi a si. Arakan League for Democracy le Rakhine National Development Party cu Arakan National Party tiin an kawmaw. Asinan an milai, kan milai tivekah an buai ruangah an remaw loih an keksal. Party thar vek an din. Hivek hi thleng hram hlah seh ti hi mipi thlacamnak a si. Thleng lo dingin hruaitu lam khalin nasa takih an timlamawk a ṭul ding.
#CNLD in an beisei mi cu Chinram acozah tuah thei le Union level ih dinhmun ṭha co hi a si. Hivek dinhmun an co lawngah mipi an rian thei ding. Chinram acozah tuah, CM dinhmun co thei ding cun Naypidaw Hluttaw ah MP ṭhahnem deuh an co a ṭul ding. NLD hi Central ah acozah an tuah ding hi cu zum cio a si. Asinan anmahtei an tuah thei cu an zum hai lo. Cutikah Tlangparmi in MP 100 lenglo an nei dingih cupawl cu sawmin acozah an tuah ding. Annih in Vice President le Union Minister cuzat timi le, an nehnak ramkulhpawl ah acozah tuah theinak le CM cu an dil tengteng ding. NLD hin lungkim lo a theih lo ding. An lungkimpi duh lo cun acozah an tuah thei lo ding. Hiruangah CNLD cu NLD thawn an thupit dan a bangaw ti a fiang. Lu lamah Kawl hotu an neih lo ruangah an helhkam pohpoh an ṭuan in an aupi thei ding. Hna tampi an ṭuan thei ding.
#CNLD hin Chin MP 21 lakah 12 hrawng tla cu an nei thei men. Cun Hakha Hluttaw ah hril mi MLA 18 lakah 10 hrawng le Sagaing CAM tla cu an la thei men thei.

  1. NLD: NLD in acozah a hohanak cu kum 4 a kim zik thlang. Asinan mipi beisei le duh vekin hna an ṭuan thei lo, an ṭuan thiam fawn lo. MP cuh dingah le Union level dinhmun `ha co dingin Politician si loin cathiam le acozah hnaṭuan sang an hril ruangah ṭhahnemngainak an tlasam, an ṭihhrut, hnaṭuan dan ding an thei lo, eiruknak a tam. Hi hin mipi bei a tidawng zet. Ralkap in an kham mi le Danhrampi in a kham mi tuah dingin an phut a si ahcun mipi mawh a si ding. Asinan ralkap khalih an lungkimpi mi, Danhrampi khalih an sian mi, an tuah thei mi tampi an tuah lo hin mipi a ti beidawng nasa.
    #Acozahan tuah pekah eithupnak an hun dodal zik ciamzo nan thla 6 hnu lamah cun acozah hlun hnak hmanin a luarsawn riangri. NLD in acozah an kaih cun sumtuahnak a ṭha dingih, ramdang sum tla a luanin a luanglut ding vekih rel cio a rak si nan acozah hlun hnak hmanin sipuaizi a se deuhdeuh, a car deuhdeuh. NLD cun Tlangparmi a ngaihsak dingah beisei cio a si nan acozah hlun hnak hmanin an dungtun sawn. Tu ih Danhrampi rem an tumnak khalah Party dang hmuahhmuah deuhthaw in mai ramkulh CM hril dingin Article 261 rem an duh laiah NLD cun rem an duh lo. NLD sanah remdaihnak um dingih beisei a si nan a hla deuhdeuh. Surbung Airport hman an hnawl zik zuakzo ih kan MP le CM pawl theih tawpin an ṭan ruangah ṭuan peh nerno men a si.
    #HiruangahTlangmipawl hi cun an ṭanpi tuk nawn lo ding. Rakhine ah Rakhine Party an cak zo ih an cak vivo hrih ding. Shan ah ralkap vote thawn USDP an cak nan SNLD in an thlun. 2020 ah cun ralkap an mal deuh le an zalen deuh ruangah SNLD an cakbik zum a si. Mon party an kawmaw, Kachin partypawl an kawmaw, Karen Party pawl an kawmaw, Kaya na remṭhaaw zo. Curuangah Tlangpar rampawl ah cun NLD cun MP an nei mumal lo ding. Asan cu Tlangparmipawl hin NLD hi an theifiang deuhdeuh thlang. Sai dum le Sai var ih pal cu a bangaw ti an theih zo ruanga pal tuar an duh nawn lo.
    #Asinan Kawl lak, Region 7 ah cun cak takin nehnak an co lai ding. Acozah tuah dingin MP 332 hrawng a ṭul ding, Kawl MP al lak thluh deuhthaw hmanah MP 250 hleilo an ngah lo ding. Curuangah Tlangparmi MP loin acozah an tuah thei lo. Tlangpar rampawl hin MP 206 hrawng an neih mi ah hin 150 hrawng tal an neh zum a si. Danhrampi lephei cu NLD, Party dangdang, Ralkap an ṭuantlang lawngah an rem thei ding.
  2. USDP: USDP hi cu an tlase deuhdeuh lai ding. Tu `um Danhrampi rem dingah khal thu si lolo tampi an rel. Ralkap hi 25% ihsin 50% ih ṭhan an duh thu tla an rel. Hi ruanga anmai sungkua le ralkap sungkua deuh lo cun an vote lem lo ding. MP 20 hrawng an neih cun a lungawium zet ding.
    4. UBP: Thura U Shwe Mann ih Union Betterment Party hi can reilote sungah Awfis 200 leng lo an awng ih member 100000 lenglo an nei man. An ṭhangcak zet. Amah U Shwe Mann khal mipi duh le rinsan a hlawh zet. Asinan Kawl lakah cun NLD an neh cu zum a si lem lo. USDP ih lungawi lo, NLD ih lungawi lo le Independent pawl vote thawn MP 10 hrawng tla cu an nei thei men.
    Tui ṭum hrangah cun hivial si hrih sehla. Politics timi cu ni hnih khat khalah a danglam thei ruangah tu ih kan zumdan vek hi a si ring ring lo ding ti hi thei cio sehla.

Salai Chin

 Credit: Meifar Thuthang

Leave a Reply

Your email address will not be published. Required fields are marked *