Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Evangelist Nih Lai Ram An Hrawh Ning

Saya Aung Myint Thang hi Bible a pom ning tam bik a kan post piak mi asi. Ka uar khunnak pakhat cu zei bantuk comment a ton hmanh ah nem tein kan theih fiangnak dingah a kan leh tawn tu a si tikah Upat a tlak ngaingai nak cu a si.

Atu atial imi hi…1. EVANGELIST HI CAWNNAK REPRAP AN NGEI HNA LO

Lai Tlang ah evangelist i a vaakmi pawl hi Baibal lei cawnnak reprap an ngeih hna lo tikah an ruahnak in mipi an cawnpiakmi hna a tampi. An theihfian lomi an cawnpiakmi hna a tampi. Acheu cu Baibal siangin ni khat hmanh a kai lomi an si tikah theology pakhat hmanh an theih lo. Khrihfa zumhnak hrampi a simi systematic theology le biblical theology, church history le Baibal context hi an theih lo bu in phungchim ah an vaak. Baibal biafang zong hi English version dang nih zeitindah a chim ve timi khi ai rel khomi an um hna lo. Minung sinak in minal sawhsawh le capo thiam sawhsawh deuh khi an si. Cu tikah Baibal doctrine ning lo in mipi lam an hruai hna i lam an pial pi hna.

2. AN HRINTTHAN BAKIN SAYA AN TTUAN CAWLH

Lai Thlang a vaakmi evangelist pawl cu tuzarh ah khamh an i fiang i, a hmai zarh ah phungchim ah an vaak cawlh. Disciple (hnu zultu) an si caan a um lo. Hnu zultu sinak ngai lo in saya an si cawlh. Chimhmi le cawnpiakmi an i nautat cawlh. Cucaah zumhnak, hngalhnak le thiamnak ah an tthangcho kho ti lo. Cu hna pawl nihcun kan Lai Tlang an van den ciammam i anmah bantuk minung tampi an hrin hna. Zultu hna cu Jesuh kum thum an zulh hnu ah Pathian rian an ttuan hna.

3. A CHIMRELMI ANMAH NIH AN TUAH LO

Evangelist pawl nih an chim pengmi cu zumhnak thlaici tuh hi a si. Zumhnak thlaici tuh a tthat ning le a herh ning kha an chim peng. Crusade an tuahnak hmun poh ah zumhnak thlaici bawm an hun peng. Asinain anmah nihcun zumhnak thlaici hi an tuh bal lo hrimhrim ti usih law kan palh theng lai lo. An tuh ve hmanh ah piangkum te i an tuhmi khi a si lai. A ngaingai ti ahcun evangelist ko nihhin thlacam piak cu an herh caah anmah ko nihhin zumhnak thlaici cu an tuh khun ding a si.Alet zaa in kan tuhmi cu kan zuun tthan ko lai ti an zumh ko ah ziah anmah nih an tuh ve hnga lo?

4. ZBC, HBA HLA AN TLAU TER

Evangelist tam deuh nihcun laam nak caah a ttha taktakmi hla pawl kha an phuah hna. Bianabia ah, Maw Zion fanu fapa tho law, doh len zong ah doh khawh a si lo etc. ti pawl kha an sakpi hna i mipi kha laam ding in an fawrhfial hna. Hi evangelist pawl nihhin hi hla porpok hi Laimi Zumtu hna thinlung an an luh ter caah kan pipu chan in an rak sakmi HBA hla cauk cu Lai Ram Khrihfa atam deuh nihcun an sa ti lo. A thiam zong mino nihcun an thiam ti hna lo. Evangelist nih HBA hla an tlau ter.

5. LAAM HI REVIVAL AH AN CHIAH

Evangelist tampi nihcun crusade an tuahnak hmun ah revival a tla tuk rak kan ti hna seh, Pathian nih a hman tuk rak kan ti hna seh ti duh ah, mipi laampi khawh bak kha an i zuammi a si. Laimi mihrut, theihnak bi vemi zong nih zaapi an van laam lulh cio ahkhan Pathian ai phuang, kan saya pa Pathian nih a hman tuk tiah an zumh cang. Mipi laamnak a chuahpi lo tu evangelist pawl cu phungchim zong an sawm duh ti hna lo. Mipi zong laam a um lo nak hmun ahcun an i pum duh ti lo. Againgai ti ahcun kan Baibal khi a ningpi in zoh u law, Pathian mihman mi vialte, Bawipa ah ai lawm mi vialte khi pumhnak hmun ah a laam mi pakhat hmanh an um lo. Korea Khrihfa vialte a laammi an um lo, asinain mission tuah a tthawng bik an si.

6. HOLHTHEIHLO HI THLARAU KHAH AH AN REL

Pathian Thlarau nih a hman tukmi asi ka ti hna seh ti duh ah holhtheihlo hla (Baibal zong i a um lo mi) an in sak pi hna. Mirang hla lih i sakmi khi a si. Minung pakhat nih a sak i mipi kha nu le pa he nan rak rock. Nu pawl um hna hlah selaw pa lawng cu nan rock huam lai lo i pa pawl rock hna hlah selaw, nu lawng zong nan rock huam hnga lo. Nu he pa he nan rock tti caah a nuam tukin nan theih i nan rock khi a si. Zei Thiang Thlarau rianttuannak hmanh ai tel lo. Thiang Thlarau ngaihchiat ter tu khi nan si.

7. TAKSA THIL AH MIPI AN BUAI TER

Thlacamh i tluk ter le taksa ramnak crusade lawng mipi nih an uar. Thla an in camh i nan tluk ah nan i lunghmuih. Thla an in camh i na tluk lo zong ah zeihmanh a poi nak a um lo. Mi a tluk ter khotu saya tampi nih thla an ka camh cang, voi khat hmanh ka tlu bal lo. Zultu hna nih mi thla an camh hna ah an tlu bal lo. Thlarau ngandamnak crusade ahcun mipi an chuak duh ti lo. Taksa damnak nan hmuh khawh nak ding ahcun mipi nan khat.

Credit: Aung Myint Thang

Leave a Reply

Your email address will not be published. Required fields are marked *