Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Chin Cafang(Alphabet Or ABC)Halkha Le Falam Ah Zeizat Veve Dah A Um?

By Salai Thomas Lian Thihlum.

Atu ka langhter dingmi hi kan Laica Falam le Halkha ahhin Cafang zeizat dah a um timi kha, Lai Cafang kong a t’ialtu minung pahnih hna t’ial ning in cuaichunh a si lai. Halkha Lai Cafang kong ahhin pakhat poh cu a dik ti le pakhat poh cu a palh tiah a tang lei na rel dih hnu ah biakhiahnak rak tuah ve te law. Chirhchan dang a ngeimi le a chuahpi kho nih nan rak chap cio naklai kan sawm fawn hna.

Pu No Than Kap nih “Halkha(Laica) ah Cafang 22 a um i, Falam(Laica) Cafang ah 27 a um” tiah a Cauk chungah a t’ial.(No Than Kap, AW! Falam:Vol.2, 2004,Chm-99). Mahka Pu Than nih a langhtermi Lai Cafang kong hi, khoika chirhchan in dah a laak timi cu a cauk chung ah ka hmuh khawh lo caah a t’ial ning tein ka hun taarnak a si.

Lai Nunphung lei ah kan Pa pakhat Pu Stephen Ni Kio nihcun mahtihin a t’ial ve: “Laimi cu Laica Cafang 23 kan rak ngei, cu hna cu Cafang fa in t’ial ahcun: a, b, c, d, e, f, g, h, i, k, l, m, n, o, p, r, s, t, t’,u, v, w, z- an si i Cafang 23 an si. Cun a peh rihmi cu: 1974 hrawng ah Pu Kio Hlun(Township Education Officer. Hlan auhnak cun Deputy Inspector of School) a t’uan lio ah Laica Committee nih an rak remh i, an remhmi cu, “a,b, c,d,e,f,g,ng,h,i,j,k,l,m,n,o,p,q,r,s,t,t’,u, v,w x,y,z – hna an si i, Cafang 29 an tuah. CACC chan a hung chuah tikah hi Cafang 29 cu kan cohlan” tiah a langhter.(Stephen Ni Kio, Laica Kan Hmuhning, NZTB, Lai Baptist Church, Yangon, Feb-2002,Chm-52).

A cunglei Chinmi kan Pale pahnih an langhtermi hi zeiruang ah dah kan cuaichunh a hauh tiah cun pakhat poh cu a palh caah a si. Pu Than nih “Aw! Falam:Vol-2” Cauk chung ah Halkha Cafang 22 lawng a um a timi khi a si taktak ko hnga maw ti kha mizapi nih ruah a hau. Aw!Falam:Vol-2 cu kum 2004 ah chuahmi Cauk a si. Nain Pu Stephen Ni Kio tu nihcun tuanpi in Halkha nih Chin Cafang 23 kan ngeih cangnak cu a langhter hlei ah, “Aw! Falam:Vol-2” Cauk chuah a si hlanpi in 1974 hrawng ah Pu Kio Hlun hruainak in Cafang 29 ah ser a rak si i, CACC zong nih cu Cafang 29 an cohlannak kong cu: Nunphung Zatlang Thanchonak Bu, Lai Baptist Church,Yangon nih “Laica kan Hmuhning” tiah 2002 kum ah an rak chuahmi Cauk chungah a langhter ve.

Atu chan Mino hna nih Lai Cafang hi zeizat dah kan ngeih timi kongah kan vaivuan sual lai maw ti ka phan caah tlawmte ka hrilhfiahmi a si. Pu Kio Hlun nih Halkha Lai Alphabet a rak remhpi hna hlan ahhin Pu Stephen Ni Kio nih “23” kan ngei a ti i, Pu No Than Kap nih Halkha Cafang “22” a um a ti ve. (Aw!Falam timi Cauk chungah hin Pu No Than Kap nih Halkha Laimi hna a huatnak hna tampi a t’ial chih caah hin Cafang kan ngeih zat zong a thei ko nain, Cafang 22 lawng an ngei tiah a kan namneh hramhrammi a si kho) Mah zawn Pu No Than Kap bia le Pu Ni Kio bia hmanh ahhin aa kalh cang. Cu lawng si loin Pu Kio Hlun nih 1974 ah Lai Alphabet 29 tiah a remhmi kha CACC(1994 ah CCLS cu CACC tiah thlen a si) nih a cohlanpiak fawn. Asinain Pu No Than Kap nih kum 2004 hrawng lawng ah Cauk a chuahmi “Aw! Falam:Vol-2” chungah Halkha Lai Cafang “22” lawng a timi hi a palh lai tiah ruah a si. Pu No Than Kap nih kum 2004 hlan Halkha Chin Cafang zeizat set a um timi felfai in a kherhhlai hmasa lo a si kho men, a ruang cu a Cauk chung ah Lai Cafang kong chirhchan hmuh a si lo. Cucaah aa palhnak a si kan ti khawh.

Tuchan t’hangthar Chin Mino hna nih kan hngalh bak dingah a herhmi cu, Laica Cafang cu “29” kan ngei timi hi a si. Cun mu, Cafang 29 cu zeitindah kan hman thiam dih lai? timi kong zong kan ruah a herh. Kan hmailei caan ahcun kan Laica Cafang hi chap t’han le ser chap zong a herh te lai caah, Atute hin Chin mino nih “Laiholh le Laica buaipi duhnak, karhchoter duhnak thinlungput” kan ngeih cio a herh lio caan taktak a si. Chin miphun vialte tho in kan Caholh tungmer chin cang hna usih.

Kaa lawm.
Salai Thomas Lian Thihlum.

Zoh Chihmi Cauk:
– Muko Mekazin, September,2010, Chm-14.
– Aw! Falam:Vol-2, 2004,Chm-99.
– Laica Kan Hmuhning, NZTB, LBC, Yangon, Feb-2002,Chm-52.

Bia kilh: Kum hmasapi ah ka rak taar canngmi a si i, Kumthar hlan ah ka von nolh t’han. A rel rih lo nih rel in a rel cia nih nolh dingin kan sawm hna. Bia tliang nan hngalhmi a um maw? ka hrawm ve u..

Leave a Reply

Your email address will not be published. Required fields are marked *