Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Nun Thap Ngam Dawtnak TakTak

Chin miphun hi dawtnak a ngeimi miphun, midang caah nunnak pek tiang in dawtnak a rak ngeimi le nawl a ngaimi miphun kan sinak hi hnulei pu pa chan in tuanbia dothlat tikah a lang.
Tu chan ah kan zoh ahcun kan miphun le ram caah nunnak le sining pek in “Dothlennak” a tuahmi hna CNF/A kan ralkap hi ansi.

Sinain cu sinak cu philh in mah pumpak hloknak le miaknak duhah midang thiltha tuahnak a hmu kho lotu le midang palhnak le tlinlonak rumro coih in a aukhuang mi le a holh rel mi zong cu Chin miphun chungah an rak um ve hoi.
Hi nihhin Chin miphun kan rak ngeihmi lungput tha le Khrihfa nunzia a daw mi kan sinak mui a chiat ter tawn. Cu bantuk lungput le ruahnak angei mi hna khi nunnak pek le midang caah thatnak asi ahcun tiah aa pe ngammi hlan kan pupa hna nih hei hmu hna sehlaw zeitluk indah an lung a fah hnga. Hlanchan Chin ram ahcun Khuabawi le Ramuk in i uk mi kan rak si tikah an khua le ram a rak humhaktu an Bawi le caah nunnak pek le sining thap le an nawl ngaih hi an rak i harh baklo tihi tuanbia zoh tikah hmuhkhawh asi. Cubantuk lungput a ngeimi minung pakhat asinak kong tlawmpal ka hun tial lai. Cu pa cu Congthia khua mi Hlawnching phun asi mi Pu Hlawn Ung timi pa asi;….


Congthia khua i ramuk Bawi Pu Za Hnok (Pu Za Hnok cu Congthia Zathang bawi Tin Kual hrin asi, Zahnok nih Liandul, Liandul nih Pakhu, Pakhu nih Tinkual II, Tinkual II nih Chiah Khar le Mang Cung) chan ahhin ngaleu zawtnak a tlun caah khuami tampi an rak thi. Cu Ngaleu zawtnak in thih tih ah Hlawnching (Hlawnching phun hi Congthia khua tlatu phun an rak si) phun Pu Hlawnung cu ngaleu zawtnak in thih tih in ramlak ah riahcawh rawnh in a va rawl. Can tlawmpal a rauh ah ngalei zawtnak nihcu  Congthia bawi Pu Za Hnok cu a tlunh ve i a thi ding in a um cang.
Hi chan ahhin Chin miphun nih Khuachia le Khuavang biak chan asi caah Khuavang sinah an bawipa Za Hnok cah raithawinak an rak tuah. Cutikah Khuavang nih a phuan mi cu ” Hlawn Ung kha va au uh law Za Hnok lu rulh seh cuti lawng in Za Hnok hi a nung lai” tiah a rak ti. Cu bia cu thih tih ah a rol mi Pu Hlawnung an va chimh. Minung sinak in nangmah thi law a nih khi nungseh ti vun theih le siding cu a hartuk mi le lungfah tuk ding khi a si. Nain an Bawipa Pu Zahnok nunnak asi ahcun a ti i “Valii thing kha ka ruakkuang caah va sai uhlaw Zupu hun ka dap uh, ka rak tlung lai” tiah a Bawipa nunnak khamh ah a nunnak pek ding in biakhiahnak a rak tuah.
Pu Hlawn Ung cu a chimbang in a rak tlung i a tlun zan deilei ah athi taktak, cun Pu Za Hnok zong cu a dam taktak ve i Fapa a ngeih mi ah “Lian Dul” tiah aa sak.
Hi nih a langhter mi cu Chin miphun cu midang caah nunnak a pe ngam mi le dawtnak le upatnak a ngeimi kan si kha asi. Cu lungput le ruahnak ruangah nihin kum 30 leng CNF/A nih ram rian a tuan. Kan ram hriamtlai lakah a si fakbik le a harsabik Dothlengtu buu ansi. An caah zei hloknak le miaknak a umlo nain Chin miphun cah tuah an mah hmang in Pathian nih Chin miphun Vawlei kili a kan culter i nun khua nuam in kan um hna. Cu lioah annih cu ramtang ah tettiam le eidin reprailo he dothlennak an tuah. Mi cheukhat nih ral he i kahlo khi dothlennak puitling lo ah ruah loin soisel le dohdal an si.
An temtuarnak le an harnak le mipi an zawnruahnak kan hmu kholo. Dawtnak ngeimi “Vakok” kong chim ahcun kan hloptlo ngai, Nawlngaimi “Sia”(Chin miphun hmelchunh) kong hei chim ah le i uangthlar ngai fawn, dawtnak le nawlngaihnak le ngeih fawnlo.
Cucahcun Chin miphun nih kan philhlo ding asi mi cu Khrihfa kan sihlan in midang caah dawtnak in nun a pe ngammi le nawlngaimi kansi kha asi.
Cu sinak cu nihin i ramtang ah kum 30 leng nun har in Dothlengtu hna kan ralkap nih an zulh i cucu Vakok dawtnak, Tilim Sia nawlngeihnak le pupa ro asimi midang caah “Nun Thap Ngam Dawtnak” asi.

Credit- Peng Hlawnceu

 

 

 

 

Leave a Reply

Your email address will not be published. Required fields are marked *